တၢ်မၤအီၣ်ညၣ်တၢ်မၤလိ (၃)

ဘၣ်ဆၣ်ဒီး မ့ၢ်နကလုၢ်အဃိဒီး, ယကပျၢ်လီၤစၤန့ၣ်လီၤ. (လူၤကၣ် - ၅း၅).

တၢ်မၤလိ (၃) - မၤသကိးတၢ်ဒီး ကစၢ်ယွၤအတၢ်သုးတၢ်ကျဲၤလၢ နတၢ်အိၣ်မူအဂီၢ်တက့ၢ်. “ဒီးဆိတ့ၢ်လၢ အစံၣ် တဲၤတဲလီၤတၢ်, ဒီးစံးဘၣ် စီၤရှံမိၣ်, သုးဃီၤကဘီဆူထံယိာ်, ဒီးဒ်သိး သုကန့ၢ်အီၣ်ညၣ်ဒီး, ပျၢ်လီၤသုစၤ တက့ၢ်. ဒီးစီၤရှံမိၣ် ကတိၤဆၢတၢ်ဒီး စံးဘၣ်အီၤ, ကစၢ်ဧၢ, ပမၤတ့ၢ်သီတနၤကျၢၤ, ဒီးပတန့ၢ် ဘၣ်တၢ်နီတမံၤဘၣ်. ဘၣ်ဆၣ် ဒီး မ့ၢ်နကလုၢ်အဃိဒီး, ယကပျၢ်လီၤစၤန့ၣ်လီၤ. ဒီးမၤဝဲဒ်န့ၣ်ဒီး, န့ၢ်ညၣ်ဂီၢ်မုၢ်ဖးဒိၣ်, ဒီးအစၤကယာ်တ့ၢ် ဒီး, ဒ်သိး အဂိၤမီၣ် အိၣ်လၢကဘီအဝဲတဘ့ၣ် အပူၤကဟဲမၤစၢၤအီၤဒီး, ဝၢ်ဃီၤအစုလီၤ” (လူၤကၣ် - ၅း၄-၆).

 
ယ့ၣ်ရှူး သိၣ်လိအပျဲၢ်အဘီၣ်တဖၣ် လၢ ကဘၣ်ဖီၣ်ညၣ်တၢ်လီၢ် ဖဲလဲၣ်, ကဘၣ်ဖီၣ်ညၣ်အခါဖဲလဲၣ်, ဒီးကဘၣ် ဖီၣ်ညၣ်ဒ်လဲၣ်လီၤ. ဒီးအဝဲကသိၣ်လိနၤ လၢနကဘၣ် မၤဒ်လဲၣ်ဒ်သိး နကကဲထီၣ်လိၣ်ထီၣ်လၢ နတၢ်အိၣ်မူအပူၤ စ့ၢ်ကီးလီၤ.

 
ဘၣ်ဆၣ် ဒ်စီၤပ့းတရူးအသိး, တဘျီတခီၣ် နတၢ်သုးတၢ်ကျဲၤတဖၣ် ဟးဂီၤဝဲသ့ တချုးလၢ နသးအိၣ် တူၢ်လိာ် ကစၢ်ယွၤအတၢ်သုးတၢ်ကျဲၤအခါလီၤ. မ့မ့ၢ်ဒ်န့ၣ်တခီ, ကစၢ်ယွၤကပျဲ အဟးဂီၤဝဲလီၤ. ဘၣ်ဆၣ်, သ့ၣ်ညါ တၢ်ခံမံၤ -

 
(၁). စီၤပ့းတရူး တကတိၤဂ့ၢ်လိာ်တၢ်ဒီးယ့ၣ်ရှူးဘၣ်, အဝဲဒိကနၣ်ဝဲလီၤ. ဒ်ပှၤမၤအီၣ်ညၣ် စဲာ်နိးတဂၤအသိး, ဘၣ်သ့ၣ်သ့ၣ်အဝဲကဆိမိၣ်ဝဲ, “ကစၢ်ဧၢ, နမ့ၢ်မတဂၤလၢ ကတဲယၤကဘၣ်မၤအီၣ်ညၣ်ဒ်လဲၣ်.” ဘၣ်တဘၣ် အဝဲကဆိမိၣ်ဒၣ်လဲာ်လၢ အဝဲမၤညၣ်ဒီတနၤကျၢၤ တန့ၢ်ညၣ်နီတဘ့ၣ်ဘၣ်န့ၣ်, မုၢ်ဟဲထီၣ်သီအံၤ မၤအီၣ်ညၣ် ကန့ၢ်ဒ်လဲၣ်. ဘၣ်ဆၣ်, အဝဲတကတိၤဂ့ၢ်လိာ်တၢ်ဘၣ်, မ့မ့ၢ်တခီ မၤထွဲဝဲဒ်ယ့ၣ်ရှူးတဲအီၤအသိးလီၤ. နကြၢးမၤ ဒ်န့ၣ်စ့ၢ်ကီးလီၤ.

 
(၂). အဝဲတဒိကနၣ် အတၢ်တူၢ်ဘၣ်ခီၣ်ဘၣ် ဘၣ်. ခီဖျိလၢအမၤတ့ၢ်ညၣ်ဒီတနၤကျၢၤအဃိ ကလီၤဘှံးဝဲ ဖးဒိၣ်ညါလံလီၤ. ဘၣ်ဆၣ် အဝဲတသံကွၢ်ဝဲ, “သူမနုၤသ့လဲၣ်. ဘၣ်မနုၤယကဘၣ်မၤညၣ်ဒံးလဲၣ်.” ကလဲၤဒ် အတၢ်တူၢ်ဘၣ်ခီၣ်ဘၣ် တဖၣ်အသိး အလီၢ်န့ၣ်, အဝဲဒၣ် အိၣ်ဒီးတၢ်နာ် လၢ ကစၢ်ခရံာ်အတၢ်အၢၣ်လီၤအီလီၤအပူၤန့ၣ်လီၤ. ဒီးတၢ်အစၢန့ၣ် လီၤကမၢကမၣ်ဒိၣ်မးလီၤ. ဒီးနမ့ၢ်ပာ်လီၤနတၢ်နာ်လၢ ယ့ၣ်ရှူးအပူၤလၢ တနံၤအံၤန့ၣ်, အဝဲကမၤတၢ်တမံၤဃီလၢ နဂီၢ်လီၤ.