ကစၢ်ယွၤကကွၢ်ထွဲနၤ

ယွၤသ့ၣ်နီၣ်ထီၣ်က့ၤပှၤလံ, ကဆိၣ်ဂ့ၤပှၤလီၤ. (စံးထီၣ်ပတြၢၤ - ၁၁၅း၁၂).

နသူနတၢ်ဆၢကတီၢ်လၢ နဘၣ်ယိၣ် တၢ်လၢအတကဲထီၣ်အသး နီတဘျီဘၣ်န့ၣ် အိၣ်ပှဲၤဘျီ လံလဲၣ်? တဲတၢ်မ့ၢ်တၢ်တီတက့ၢ်. ခီဖျိလၢနဘၣ်ယိၣ်တၢ် အဃိ တၢ်ဂ့ၤထီၣ်ကဒါက့ၤန့ၣ် အိၣ်တဘျီဘျီလံဧါ. တအိၣ်နီတဘျီဒံးဘၣ်. စီၤပီလူးကွဲးဝဲ, “သုသူၣ်စူၤသးစူၤအံၤ, မ်အအိၣ်ဖျါလၢ ပှၤခဲလၢာ်အမဲာ်ညါ တက့ၢ်. ကစၢ်အိၣ်ဘူးတ့ၢ်လီၤ. သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢ တၢ်ကိးမံၤဒဲးန့ၣ် လၢတၢ်ထုကဖၣ်, ဒီးလၢ တၢ်ဃ့ကညးအိၣ်ဒီး တၢ်စံးထီၣ်ပတြၢၤ တၢ်အဘျုးအဖှိၣ်အပူၤန့ၣ်, ဘိးဘၣ်သ့ၣ်ညါယွၤလၢ သုတၢ်အဲၣ်ဒိး တဖၣ်န့ၣ်တက့ၢ်” (ဖံလံးပံၤ ၄း၅-၆).

 
ဝံၤအလီၢ်ခံ, အဝဲဟ့ၣ်ဂံၢ်ဟ့ၣ်ဘါ ပှၤလၢ ပမ့ၢ်မၤတၢ်အံၤန့ၣ်, ယွၤအတၢ်ဃူတၢ်ဖိး ကမၤပှဲၤ ပသးဒီး ပတၢ်ဆိ ကမိၣ်တဖၣ်န့ၣ်လီၤ (ကွၢ် ဖံလံးပံၤ ၄း၇). ဖဲနစးထီၣ်ဘၣ်ယိၣ်တၢ်လၢ တၢ်တမံၤမံၤအဃိလံန့ၣ်, ဟ့ၣ်လီၤနတၢ် ဘၣ်ယိၣ်အံၤဆူကစၢ်ယွၤအအိၣ် ခီဖျိ တၢ်ထုကဖၣ်တက့ၢ်. ပျၢ်ကွံာ်တၢ်ဝံဃၢတဖၣ်အံၤ, ဒီး နာ်ယွၤလၢလၢ ပှဲၤပှဲၤ လၢကဒုးနဲၣ်နၤ တၢ်လၢနကဘၣ်မၤ, မ့တမ့ၢ် ဒုးနဲၣ်နၤ လၢ အဝဲဒၣ် ကကွၢ်ထွဲတၢ်ဂ့ၢ်အံၤလၢအကစၢ်ဒၣ်ဝဲ န့ၣ်တက့ၢ်.

 
တၢ်ထုကဖၣ်မ့ၢ် တၢ်စိကမီၤ အဒိၣ်ကတၢၢ်လၢ ကထီဒါ တၢ်ဘၣ်ယိၣ်အဂီၢ်လီၤ. ဖဲနတူၢ်ဘၣ် တၢ်ဆီၣ်သနံးနၤ အခါ, နကတဲတၢ်ဂ့ၢ်အံၤဆူ ပှၤဂၤအအိၣ် အလီၢ်န့ၣ် နဘါထုကဖၣ်လၢ တၢ်ဂ့ၢ်အံၤအဂီၢ်န့ၣ် မ့ၢ်တၢ်လၢ အဂ့ၤ ကတၢၢ်လီၤ. တၢ်မၤအဝဲအံၤ မ့ၢ်တၢ်ညီညီဖိလီၤဧါ? တညီဘၣ်. နမ့ၢ်ဘၣ်ယိၣ်တၢ်လၢ နတၢ်အိၣ်မူအပူၤ တစိၤသးန့ၣ်, တၢ်ဘၣ်ယိၣ်ကဲထီၣ် နလုၢ်နလၢ်လီၤ. ဘၣ်ဆၣ်, နမ့ၢ်ပာ်လီၤနသးကျၢၤမူဆှူ ဃုာ်ဒီး ကစၢ်ယွၤအတၢ်မၤစၢၤန့ၣ်, နမၤနၢၤတၢ်ဘၣ်ယိၣ်အံၤသ့ဝဲလီၤ.

 
လၢနကမၤတၢ်အံၤအဂီၢ် နီၣ်ဝံာ်ခံ အိၣ်ဝဲခံခါလီၤ. (၁). နကမၤဟးမၢ်ကွံာ် နတၢ်ဆိကမိၣ်လၢအတဂ့ၤဘၣ် အလီၢ် န့ၣ်, မၤပှဲၤအီၤဒီး တၢ်ဆိကမိၣ်လၢအဂ့ၤတဖၣ်တက့ၢ်. မ့ၢ်တၢ်လၢအဘၣ်ထွဲဒီးလံာ်စီဆှံ အတၢ်စံးတၢ်ကတိၤလီၤ. (ကွၢ် ဖံလံးပံၤ ၄း၈). (၂). မၤအီၤချ့သဒံးတက့ၢ်. ဖဲနစးထီၣ်ဘၣ်ယိၣ်တၢ်န့ၣ်, စံး “ယတဘၣ်ယိၣ်တၢ်ဘၣ်. ယတဘၣ်ယိၣ်တၢ်လၢ တၢ်ဂ့ၢ်အံၤအဃိဘၣ်, မ့ၢ်လၢတဂ့ၤဘၣ်အဃိလီၤ.” နကကမၢကမၣ်, “ဘၣ်ဆၣ်, မတဂၤကကွၢ်ထဲ တၢ်ကီတၢ်ခဲအံၤလဲၣ်?” ကစၢ်ယွၤကကွၢ်ထွဲဝဲလီၤ. ကစၢ်ယွၤအကလုၢ်ကထါစံးဝဲ, “ယွၤသ့ၣ်နီၣ် ထီၣ်က့ၤပှၤလံ, ကဆိၣ်ဂ့ၤပှၤလီၤ.”