နၤအိၣ်ဘှီၣ်ဧါ?

ဒီးကွၢ်ကွၢ်, နကဒၢထီၣ် ဒီးနကဆံးစၢ်န့ၢ်နဖိခွါ, ဒီးနဘၣ်ယုၢ်အမံၤလၢ ယ့ၣ်ရှူးလီၤ. (လူၤကၣ်-၁း၃၁).

ခရံာ်အိၣ်ဖျဲၣ်အတၢ်သးဝံၣ်အကျါ တၢ်ကတိၤတဘီလၢ အမ့ၢ် နၤအိၣ်ဘှီၣ်န့ၣ် ပသးဝံၣ်အီၤလၢ ပနီၢ်ဆံးခါ လံၤလံၤလံ. ဘၣ်ဆၣ် တၢ်ကတိၤအဝဲန့ၣ် တဟဲလၢ လံာ်စီဆှံအပူၤဘၣ်. နၤအိၣ်ဘှီၣ်န့ၣ် မ့ၢ်ထါတယုၢ် လၢဘၣ်တၢ်ကွဲးအီၤ လၢ အီးစတြံယါ တၢ်အိၣ်ဖှိၣ်သရၣ်တဂၤဖဲ ၁၈၁၆ နံၣ်အပူၤန့ၣ်လီၤ. တၢ်ကတိၤတဖျၢၣ်အံၤ ပာ်ဖျါထီၣ် ပှၤဒီမါဝၤ ခံဂၤ ကွၢ်ဝဲဒၣ် အဖိအိၣ်ဖျဲၣ်လီၤသီသီဖိတဂၤ လၢတၢ်သးဖှံအပူၤလီၤ. ဘၣ်ဆၣ်, တလီၤဂာ်လၢ တၢ်အိၣ်ဘှီၣ်ကလာ် အိၣ်ဝဲဘၣ်.

 
စီၤယိၤသးဒီး နီၢ်မၤရံလၢ အဟုးအသးဘၣ်လံတဂၤ တဃုတၢ်လီၢ်လၢ အပတီၢ်ထီလၢ ကအိၣ်ဝဲဆိးဝဲအဂီၢ် လၢဝ့ၢ်ဘ့ၤသလ့ဃ့ၣ် အပူၤဘၣ်. အဝဲသ့ၣ်ဃ့ဝဲလၢ ကအိၣ်လၢ တၢ်ပာ်ဆၣ်ဖိကီၢ်ဖိအလီၢ်, လၢအပှဲၤဒီး ဆၣ်ဖိ ကီၢ်ဖိတဖၣ်အဃိ တမ့ၢ်နၤအိၣ်ဘှီၣ်လၢ အဝဲသ့ၣ်အဂီၢ်ဘၣ်. တကးဒံးဘၣ်, ဖဲမိၢ်တဂၤ အိၣ်ဖျဲၣ်လီၤအဖိအဆၢ ကတီၢ် ကသံၣ်လၢအမၤစၢ်လီၤ တၢ်ဆါမ့ၢ်တအိၣ်ဘၣ်န့ၣ် အိၣ်ဘှီၣ်ဝဲ ကသ့ဒ်လဲၣ်.

လၢနီၢ်မၤရံ, စီၤယိၤသး, ဒီး ဖိသၣ်ယ့ၣ်ရှူးအဂီၢ် တမ့ၢ်နၤတနၤ လၢ အအိၣ်ဘှီၣ်ကလာ်ဘၣ်. ဘၣ်ဆၣ်, တၢ်သးဝံၣ် အဖျၢၣ်စံးစ့ၢ်ကီးဝဲ “နၤစီဆှံ” အဃိ, မ့ၢ်သပှၢ်ကတၢၢ် နၤခဲလၢာ်လၢတၢ်စံၣ်စိၤတဲစိၤပူၤ အကျါ နၤအဝဲန့ၣ် မ့ၢ်နၤ စီဆှံကတၢၢ်လီၤ. မ့ၢ်နၤတနၤလၢ ကစၢ်ယွၤ ကတဲာ်ကတီၤဝဲ လၢအကဟဲဆူဟီၣ်ခိၣ်ချၢ ဒီး မၤပူၤဖျဲးက့ၤ သိဖိလၢ အဟါမၢ်တဖၣ်လီၤ. “ဒ်ပစံးတၢ်အသိး, ယွၤအိၣ်လၢခရံာ်အပူၤဒီး, မၤဘၣ်လိာ်က့ၤဟီၣ်ခိၣ်ဒီး အကစၢ်ဒၣ်ဝဲ, ဒီး တပာ်ဘၣ် တၢ်ကမၣ်လၢ အလိၤဘၣ်, ဒီး ဟ့ၣ်လီၤ တၢ်မၤဘၣ်လိာ်က့ၤ အကလုၢ်အကထါလၢ ပှၤလီၤ” (၂ ကရံၣ်သူး - ၅း၁၉).

 
ယ့ၣ်ရှူးဟဲလီၤဆူဟီၣ်ခိၣ်ချၢ ဟံးန့ၢ်ပှၤဟီၣ်ခိၣ်ဖိ အတၢ်ဒဲးဘးလၢ အကစၢ်ဒၣ်ဝဲ, “ဒ်သိး ပကကဲလၢ ယွၤအတၢ် တီတၢ်လိၤလၢအပူၤလီၤ.” (၂ ကရံၣ်သူး - ၅း၂၁). တၢ်လၢအကစီဆှံန့ၢ် တၢ်အဝဲန့ၣ်တအိၣ်နီတမံၤဘၣ်. “လၢတၢ်ခံး ဖျိတၢ်ကပီၤ” လၢတၢ်စီဆှံကတၢၢ်အနၤန့ၣ်, ပသးဒီးပနီၢ်ခိ အတၢ်ခံးတၢ်နၤတဖၣ် ကစၢ်ယ့ၣ်ရှူးခရံာ်, လၢအမ့ၢ် ဟီၣ်ခိၣ်အတၢ်ကပီၤ, မၤဟးဂီၤကွံာ်အီၤခဲလၢာ်လံ. ပတၢ်ပျံၤတၢ်ဖုးအလီၢ် ဒ် ပှၤတၢ်ဒဲးဘးဖိလၢအလီၤမၢ် အသိး အံၤ ဘၣ်တၢ်မၤပှဲၤက့ၤအီၤဒီး တၢ်ဃူတၢ်ဖိး ဒီး တၢ်သူၣ်ခုသးခု အတၢ်အုၣ်ကီၤ, လၢအမ့ၢ်, ပမ့ၢ် ကစၢ်ယွၤ အပှၤဂီၢ်မုၢ်လၢ ကစၢ်ယွၤပျၢ်ပတၢ်ကမၣ်လီၤထူလီၤယိာ် လီၤ.