နဟ့ၣ်တၢ်အပှ့ၤကဲဧါ?

မၤသးဒ်န့ၣ်ဒီး ယဃ့ၢ်တၢ်ဒ်န့ၣ်အသိး, ဒ်ပှၤသးဒ့ဒီအသိး တမ့ၢ်ဘၣ်. ယထိတၢ်ဒ်န့ၣ်အသိး, ဒ်ပှၤတီၢ်ကလံၤ အသိး တမ့ၢ်ဘၣ်. (၁ ကရံၣ်သူး - ၉း၂၆).

ပှၤဃ့ၢ်တၢ်ယံၤတဖၣ် တမ့ၢ်ထဲအကွၢ်ထဲ အတၢ်ဃ့ၢ်ချ့န့ၣ်ဘၣ်, ဘၣ်ကွၢ်စ့ၢ်ကီး အတၢ်ထဲးဂံၢ်ထဲးဘါ အိၣ်ထဲလဲၣ် န့ၣ်လီၤ. အဝဲသ့ၣ်ဃ့ၢ်တၢ်တပယူာ်ဃီ ဒ်န့ၣ်အသိးအဃိ, တုၤအဝဲသ့ၣ်ဘူးကတုၤ ဖီတၢၣ်န့ၣ် အဝဲသ့ၣ်မၤဆူၣ်ထီၣ် အတၢ်ဃ့ၢ် သ့ဝဲန့ၣ်လီၤ.

 
စီၤပီလူးစံးဝဲ, “မၤသးဒ်န့ၣ်ဒီး ယဃ့ၢ်တၢ်ဒ်န့ၣ်အသိး, ဒ်ပှၤသးဒ့ဒီအသိး တမ့ၢ်ဘၣ်. ယထိတၢ်ဒ်န့ၣ်အသိး, ဒ်ပှၤတီၢ် ကလံၤအသိးတမ့ၢ်ဘၣ်. မ့ၢ်ယမၤနၢၤမၤဃၣ်ယနီၢ်ခိ, ဒီးယမၢအကဲကုၢ်ဒ်သိး ယစံၣ်တဲၤတဲလီၤတၢ်လၢ ပှၤဂၤဝံၤဒီး, ယသုတကဲလၢ ပှၤဘၣ်တၢ်ညိကွံာ်အီၤ ယကစၢ်ဒၣ်ယဲတဂ့ၤလီၤ.” (၁ ကရံၣ်သူး - ၉း၂၆-၂၇). ပှၤလၢအဃ့ၢ် တၢ်ယံၤ တဖၣ်န့ၣ် တတူၢ်ဃၣ်အသး ညီကဒၣ်ဘၣ်. အဝဲသ့ၣ်မ့ၢ်ဘၣ်သဂၢၢ် တၢ်ကီတၢ်ခဲ ဒီး တၢ်သးဟးဂီၤ လၢကျဲ ဘၣ်ဆၣ်, အဝဲသ့ၣ်တဆ့ၣ်နီၤလၢ ကျဲကပၤ ဒီးဟ့ၣ်ဂံၢ်ဟ့ၣ်ဘါ ပှၤဃ့ၢ်တၢ်ဖိ အဂၤသ့ၣ် တဖၣ်လၢ အဟ့ၣ်လီၤ အသးလၢတၢ်ဃ့ၢ်ပြၢအဂီၢ်ဘၣ်.

 
အဃိ, နမ့မ့ၢ်ပှၤတဂၤလၢ အအဲၣ်ဒိးမၤလၢပှဲၤ ကစၢ်ယွၤအတၢ်တိာ်ပာ်လၢ နတၢ်အိၣ်မူအဂီၢ်န့ၣ်, ဟ့ၣ်တၢ်ကိးမံၤဒဲး လၢအအိၣ်ဒီးနၤတက့ၢ်. ဂုာ်ကျဲးစၢးအီၤ, ဒီးတဘၣ်သးပ့ၤနီၣ်လၢ နမ့အိၣ်ဒီး တၤလၣ်ဒ်အါ, နမူဒါအိၣ်ဒ်အါ န့ၣ်တဂ့ၤ. အဝဲအံၤမ့ၢ်တၢ်တမံၤလၢ နကမၤနၢၤတၢ်အဂီၢ်, ဒီးမ့ၢ်စ့ၢ်ကီး တၢ်အဂၤတမံၤလၢ ကဖီၣ်ဂၢၢ် တၢ်ဆီၣ်သနံး လၢလဲၤဃုာ်ဒီးနၤ အဂီၢ်လီၤ.

 
“ဒီးပှၤလၢအဒုးကဲထီၣ်ဒီး မၤလၢထီၣ်ပှဲၤထီၣ် ပတၢ်နာ်, ယ့ၣ်ရှူးတဂၤန့ၣ်, မ်ပကွၢ်ဃီၤတၢ်ဆူ အအိၣ်တက့ၢ်.” (ဧ့ၤဘြံၤ - ၁၂း၂). နမ့ၢ်အိၣ်ဒီး တၢ်ဒိၣ်တၢ်မုၢ်တမံၤ လၢနကကွၢ်စိဃီၤ တၢ်လၢအအိၣ်န့ၣ် ကမၤစၢၤနၤလၢ နကထဲးဂံၢ်ထဲးဘါ ဆူညါအဂီၢ်လီၤ. ဒီးကစၢ်ယွၤ ကဒုးထံၣ်နၤလၢ တၢ်ထီဒါနၤဒီး တၢ်တဲအၢတဲသီနၤ ဒ်သိး ကမၤဆူၣ်ထီၣ် နသကဲာ် ပဝးအဂီၢ်န့ၣ်လီၤ. လၢတၢ်န့ၣ်အဃိ, ဖဲတၢ်ဆိၣ်ဂ့ၤဆိၣ်ဝါဒိၣ်ဒိၣ်မုၢ်မုၢ် ဒီး မူဒါလၢနကဘၣ်မၤတဖၣ် ဟဲဝဲန့ၣ်, နလဲၤခီဖျိအီၤကသ့ဝဲ လီၤ.

 
တၢ်မၤနၢၤတၢ်န့ၣ် ကဲထီၣ်အသးသ့ဝဲဖဲ နအိၣ်ဒီးသးလၢ အအဲၣ်ဒိး လဲၤခီဂာ် ဖီတၢၣ်တၢ်ပနီၣ် အခါန့ၣ်လီၤ. အဃိ တၢ်သံကွၢ်န့ၣ်မ့ၢ်ဝဲ, မ့ၢ်နဟ့ၣ်တၢ်အပှ့ၤကဲဧါ. ဖဲတၢ်ဆီၣ်သနံးနၤအိၣ်ထီၣ်အခါန့ၣ်, မ့ၢ်နဂဲၤထၢၣ်ဒ် စီၤနဃ့မယၤ အသိး, ဖဲအဝဲဒၣ်တ့ထီၣ်က့ၤ ဝ့ၢ်ယရူၤရှလ့ၣ်အတၢ်ဒူၣ်အခါ တဲဘၣ်ပှၤလၢအထီဒါအီၤတဖၣ်, “ယမၤတၢ်မၤဖးဒိၣ်, ဒီးယဟဲလီၤတသ့ဘၣ်” (နဃ့မၤယၤ ၆း၃). နတၢ်စံးဆၢမ့မ့ၢ် “ကဲလီၤ” န့ၣ်, ကွၢ်တၢ်လိၤလိၤဆူ ဖီတၢၣ်အအိၣ်, ဒီးဃ့ၢ်တုၤလၢ ဖီတၢၣ်အတၢ်ပနီၣ်အအိၣ်န့ၣ်တက့ၢ်.