ကလံၤအူဆီၣ်ကဒါက့ၤတၢ် (၂)

ဒီးစံးဘၣ်အီၤ, ပှၤကညီသ့ၣ်ဧၢ, ယသ့ၣ်ညါလၢ ပလဲၤတၢ်လၢပီၣ်လဲၣ်အံၤ, ကအိၣ်ဒီးတၢ်ဟးဂူာ်ဟးဂီၤ, ဒီး တၢ်ဟါမၢ်အါအါကလဲာ်, … (မၤတၢ် - ၂၇း၁၀).

စီၤပီလူး တဲဘၣ်ပှၤကိးဂၤဒဲးလၢအအိၣ်လၢကဘီပူၤ လၢအလဲၤဆူ ဝ့ၢ်ရိမ့ၤတဖၣ်ဒ်အံၤ, “ဒီးစံးဘၣ်အီၤ, ပှၤကညီ သ့ၣ်ဧၢ, ယသ့ၣ်ညါလၢ ပလဲၤတၢ်လၢ ပီၣ်လဲၣ်အံၤ, ကအိၣ်ဒီး တၢ်ဟးဂူာ်ဟးဂီၤ, ဒီးတၢ်ဟါမူၤဟါမၢ် အါအါ ကလဲာ်, ထဲကဘီ, ဒီးတၢ်ဖိတၢ်လံၤဧိၤတမ့ၢ်ဘၣ်, မ့ၢ်လၢပသးတဖၣ် စ့ၢ်ကီးလီၤ.” (မၤတၢ် - ၂၇း၁၀). ပှၤကွဲးလံာ် တဂၤကွဲးဝဲဒ်အံၤ, “စီၤပီလူးတတဲတၢ်ဘၣ်ဃး တၢ်ဒုးတဆံးတက့ၢ်ဧိၤ, မ့တမ့ၢ် တၢ်ဟါမူၤဟါမၢ် တဆံးတက့ၢ် ဧိၤဘၣ်. မ့မ့ၢ်တခီ, တၢ်လဲၤတဘျီအံၤ ကဘၣ်သဂၢၢ်ဒီး တၢ်ကီတၢ်ခဲဒိၣ်ဒိၣ်မုၢ်မုၢ်, လၢအပၣ်ဃုာ်ဒီး တၢ်ဟါမၢ် အါအါဂီၢ်ဂီၢ်, ဃုာ်ဒီးအသးသမူဒၣ်လဲာ် လီၤ. လၢစီၤပီလူးအဂီၢ်, တၢ်လဲၤတဘျီအံၤ အလီၢ်ခံကတၢၢ် ကမ့ၢ် တၢ်လဲၤဒ် မၤထူရၤအသိးလီၤ. သနာ်က့, တချုး စီၤပီလူးမၤလၢပှဲၤ အမံးရှၢၣ်တၢ်ဖံးတၢ်မၤ တဖၣ်ဒံးဘၣ်န့ၣ်, အတသံဒံးဘၣ်. ကဘၣ်လဲၤတဲတၢ်သးခုကစီၣ်လၢ ရိမ့ၤဘီမုၢ် အဝ့ၢ်ခိၣ် လၢအမ့ၢ် ဝ့ၢ်ရိမ့ၤအပူၤဒံးန့ၣ်လီၤ. တၢ်န့ၣ်မ့ၢ်ဝဲ, ထံဂ့ၢ်ကီၢ်ဂ့ၢ် အတၢ်သ့ၣ်ညါ, တၢ်ဒုးတၢ်ယၤ အတၢ်ဒိၣ်စိ, ဒီး တၢ်ပာ်ကဖၢသး အလီၢ်န့ၣ်လီၤ.

 
ဖဲစီၤပီလူး လဲၤနုာ်လီၤဆူ ဝ့ၢ်ရိမ့ၤအပူၤ ဃုာ်ဒီးတၢ်သးခုကစီၣ်အခါ, ပျုၤပူၤဟူးဝးဝဲ, ဒီး မူခိၣ်အသုးမုၢ်ဂီၢ်မုၢ် သူၣ်ခု သးခုဝဲဒိၣ်မးလီၤ. ပဒိးန့ၢ်တၢ်ဘျုးတၢ်ဖှိၣ်အါမး, မ့ၢ်လၢ ပှၤတဂၤလၢ အလဲၤနုာ်လီၤဆူ ဝ့ၢ်ရိမ့ၤအပူၤ လၢအဘၣ် တၢ်ဒုးကွီၤအီၤလၢ ပျံၤထးအကွီၤတဖၣ်လၢအကိာ်ဘိလိၤ, လၢအစးထီၣ် ဆှၢပှၤရိမ့ၤဖိ အါမးဆူကစၢ်ယွၤ အအိၣ်, ဒီးလၢအဟ့ၣ်ပှၤ လံာ်အ့းဖ့းစူး, ကလီးစဲ, ဖံလံးပံၤ, ဒီး ဖံလ့ၤမိၣ်တဖၣ် ဖဲအကဲပှၤဃိာ်ဖိလၢခရံာ်အဂီၢ် အခါဒၣ်လဲာ် တဂၤအဃိန့ၣ်လီၤ.

 
တၢ်စံးတၢ်ကတိၤလၢ လံာ်မၤတၢ် ၂၇း၄-၂၆ အပူၤတဖၣ် ဟဲစိာ်တၢ်လဲၤလၢကဘီတဘျီအံၤလၢ တၢ်မူအါမးလီၤ. "... ကလံၤတလိၤဘၣ် ... ဒီးပလဲၤကဘဲးကဘဲး... ဒီးပလဲၤပူၤကွံာ်ဖဲန့ၣ်ကီကီဒီး... ဒီးလဲၤတၢ်လၢပီၣ်လဲၣ်ကီကီ ခဲခဲ သတးဒီး... တုၤကလံၤဟဲထီၣ်လၢကလံၤထံး သြီသြီဒီး ... ပထုးထီၣ်နီၣ်သက့ၤ ... ဒီးတုၤကဘီဘၣ်ဝဲဒီး, စါကလံၤ တသ့ဘၣ်ဒီးပပျဲတၢ်... ပဟံးန့ၢ်ချံဖိကီမး ... ဘံတရံးဃာ်ကဘီလၢလာ်ခီ ... ပှၤတ့ၢ်လီၤကွံာ်တၢ်ဖိတၢ် လံၤ... ဒီးအါနံၤအါသီအတီၢ်ပူၤန့ၣ်, မုၢ်မ့ၢ်ဂ့ၤ, ဆၣ်ဧိၤဖီဧိၤမ့ၢ်ဂ့ၤ, တအိၣ်ဖျါထီၣ်ဘၣ် ... ပကတုၤလၢ တၢ်အုၣ်က့ၤ ခီၣ်က့ၤန့ၣ်, တၢ်မုၢ်လၢ်တအိၣ်လၢၤဘၣ် လ့ၤတက့ၤဘၣ် ...” တၢ်လီၢ်လၢကလဲၤတုၤဝဲန့ၣ် အိၣ်တ့ၢ်ဝဲဘူးဘူးဖိလီၤ. ဘၣ်ဆၣ် တၢ်ဟးဂူာ်ဟးဂီၤကအိၣ်ဝဲအါအါဂီၢ်ဂီၢ်လီၤ. ဘၣ်ဆၣ် ကစၢ်ယွၤတမၤကတၢၢ် တၢ်ဃဲၤပူ ဖဲန့ၣ်ဘၣ်. “မ့မ့ၢ် ပှၤသုးဖိ တကယၤအခိၣ်န့ၣ်, တၢ်မိၣ်အုၣ်က့ၤခီၣ်က့ၤအသးလၢ စီၤပီလူးဒီး, တြီဝဲ, ဒီးမၤလိာ်ဝဲလၢ ပှၤပီၢ်ထံသ့ တဖၣ် ကစံၣ်လီၤဆိ, ဒီးတုၤလၢခိ, ဒီးပှၤအိၣ်လီၤတဲာ်တနီၤနီၤ လၢသ့ၣ်ဘ့ၣ်ဘၣ်အဖီခိၣ်, ဒီးတနီၤနီၤလၢ တၢ်ဘၣ်ဃး ဒီး ကဘီဟးဂီၤန့ၣ် အဖီခိၣ်လီၤ. မၤဝဲဒ်န့ၣ်ဒီး ပှၤတုၤလၢ တၢ်အုၣ်က့ၤခီၣ်က့ၤဆူခိ ခဲလၢာ်လီၤ.” (မၤတၢ် ၂၇း၄၄-၄၅).

 
ဖဲနကွၢ်တၢ်ဆူကစၢ်ယ့ၣ်ရှူးခရံာ်အအိၣ်လိၤလိၤန့ၣ်, ကလံၤမုၢ်မ့ၢ်အူတၢ် ဆူၣ်ဆူၣ်ဘၣ်ဆၣ် နကမၤနၢၤတၢ်လီၤ. အဝဲန့ၣ်မ့ၢ်တၢ်လီၤတံၢ်လီၤဆဲးလီၤ.