တၢ်ကဲထီၣ်သိဖိ (၁)

ယွၤမ့ၢ်ယပှၤကွၢ်သိ, တၢ်တမိၣ်န့ၢ်ဘၣ်ယသးလၢ တၢ်နီတမံၤဘၣ်. (ထါစံးထီၣ်ပတြၢၤ - ၂၃း၁).

လံာ်ထါစံးထီၣ်ပတြၢၤ အယုၢ် ၂၃ အံၤ ဘၣ်သ့ၣ်သ့ၣ် နတိၢ်ရူးအီၤန့ၢ်ဂ့ၤဂ့ၤလၢ နနီၢ်ဆံးခါလံၤလံၤလံ. ဒီးတၢ် အက့ၢ်အဂီၤလၢ လံာ်စီဆှံတဆၢအံၤအပူၤ ပကထံၣ်သ့ၣ်နီၣ်အီၤ လၢတၢ်ဆၢကတီၢ်ဖးယံာ်ညါအပူၤလီၤ. ပှၤကွဲးလံာ်ဖိ ဟါနၤစမံး (Hannah Whitall Smith) စံးဝဲ, “တၢ်လၢပလိၣ်ဘၣ်အဒိၣ်ကတၢၢ်န့ၣ် မ့ၢ်တၢ်က့ၤ ကဒါက့ၤဆူ ပနီၢ်ဆံးအခါ, ဒီးဟံးန့ၢ်လံာ်စီဆှံတဆၢအံၤ တဘျီကဒီး, ဒီးဖးအီၤဒ် ပှၤဒိၣ်တုာ်ခိၣ်ပှဲၤ အတၢ်သ့ၣ်ညါ အသိး, ဒီးနာ်အီၤဒ် ဖိသၣ်အတၢ်စူၢ်တၢ်နာ်အသိး န့ၣ်လီၤ.”

 
ဒ်ပှၤဒိၣ်တုာ်ခိၣ်ပှဲၤတဖၣ်အသိး, ပအိၣ်ဒီးသးအတၢ်လီၤဘှံးလီၤတီၤသ့ဝဲဒၣ် ညီကဒၣ်, တကးဘၣ် တၢ်သူၣ်ခုသးခု ယိယိဖိဒၣ်လဲာ် လီၤမၢ်ကွံာ်သ့ ခီဖျိ တၢ်အိၣ်သးအတၢ်ဆီၣ်သနံးပှၤအဃိလီၤ. ဘၣ်ဆၣ်, ပကဘၣ်သ့ၣ်နီၣ်ထီၣ်က့ၤ တၢ်သၢမံၤလၢအမ့ၢ်,-

 
(၁). ပှၤကွၢ်သိမ့ၢ်မတၤတဂၤလဲၣ်. မ့ၢ်ဒၣ် “ကစၢ်ယွၤ” လီၤ. အဝဲမ့ၢ် တၢ်လၢပလိၣ်ဘၣ်ခဲလၢာ် အခီၣ်ထံးခီၣ်ဘိ, လၢအစးထီၣ် အသး လၢ တၢ်ဒိးန့ၢ်တၢ်အုၣ်က့ၤခီၣ်က့ၤဒၣ်လဲာ်လီၤ. ယ့ၣ်ရှူးစံးဝဲဒၣ်, “ယဲဒၣ်အံၤ, ယမ့ၢ်ပှၤကွၢ်သိ, လၢအဂ့ၤ တဂၤလီၤ. ပှၤကွၢ်သိလၢ အဂ့ၤတဂၤန့ၣ်, ပာ်လီၤကွံာ်အသးသမူလၢ သိအဂီၢ်လီၤ.” (ယိၤဟၣ် - ၁၀း၁၁).

 
(၂). ပှၤကွၢ်သိအတၢ်မၤမ့ၢ်တၢ်မနုၤလဲၣ်. မ့ၢ်တၢ်ဒီသဒၢဒီး တၢ်လုၢ်အီၣ်လုၢ်အီ သိဖိတဖၣ်န့ၣ်လီၤ. ဒီးအဝဲသ့ၣ်ညါ သိလၢအတမၤကျဲ, သိလၢအခိၣ်ကိၤ, သိလၢအဂံၢ်စၢ်ဘါစၢ်တဖၣ် န့ၣ်ဘၣ်မၤအီၤဒ်လဲၣ်, ဒီးဘၣ်ကဟုကယာ် အဝဲသ့ၣ်ဒ်လဲၣ်န့ၣ်လီၤ. တချုးလၢယ့ၣ်ရှူးခရံာ် ဟဲလီၤဆူဟီၣ်ခိၣ်ချၢဒံးဘၣ်န့ၣ်, ကစၢ်ယွၤစံးဝဲ, “ယကအုၣ်က့ၤ ခီၣ်က့ၤယသိတဖု, ဒီးတကဲထီၣ်လၢၤဘၣ်တၢ်ဂုာ်န့ၢ်အလီၢ်, ဒီးယကစံၣ်ညီၣ်တၢ်လၢ သိဒီး သိအဘၢၣ်စၢၤလီၤ. ဒီး ယကပာ်ပှၤကွၢ်သိတဂၤလၢ အဖီခိၣ်, ဒီးကကွၢ်အီၤ, ယခ့ယပှၤစီၤဒၤဝံးဒၣ်လဲာ်လီၤ. ကကွၢ်အီၤ, ဒီးကကဲထီၣ် အပှၤကွၢ်သိလီၤ.” (ယဃ့းစက့လး - ၃၄း၂၂-၂၃).

 
(၃). သိဖိအတၢ်မၤမ့ၢ်တၢ်မနုၤလဲၣ်. ကဘၣ်နာ်ပှၤကွၢ်သိလၢလၢပှဲၤပှဲၤလီၤ. သိဖိမ့ၢ်ဂုာ်ကျဲးစၢး မၤပှၤကွၢ်သိ အတၢ်မၤန့ၣ် ကကဲထီၣ်တၢ်လီၤဘှံးလီၤတီၤအလီၢ် ဒီးကဘၣ်တၢ်မၤနၢၤအီၤလီၤ. ပကဘၣ်နာ်အီၤလၢလၢပှဲၤပှဲၤဒ် ဖိသၣ် အတၢ်စူၢ်တၢ်နာ်အသိး လၢ ယ့ၣ်ရှူးန့ၣ် ပဒိးသန့ၤပသးလၢအီၤသ့, ဒီးမ့ၢ်ပှၤကွၢ်သိလၢ အဟ့ၣ်လီၤအသး ဒီး အမၤ တၢ်သ့ခဲလၢာ်, ဒီး ပကအိၣ်မူဒ် ပနာ်အီၤအသိးန့ၣ်တက့ၢ်. ဒီးသ့ၣ်ညါလၢ အတၢ်ဂ့ၤဒီး အတၢ်သူၣ်ကညီၤ သးကညီၤ တဖၣ် ကပိာ်ထီၣ်ပခံ လၢပတၢ်အိၣ်မူအမုၢ်နံၤမုၢ်သီခဲလၢာ်အပူၤ, ဒီး စိာ်ကဖီထီၣ် ပတၢ်သူၣ်ကိၢ် သးဂီၤတဖၣ် ဒီး မၤဟါမၢ်ကွံာ် ပတၢ်ကိၢ်တၢ်ဂီၤလၢ ကဟဲဆူညါတဖၣ်န့ၣ်တက့ၢ်.