မ့ၢ်နထုကဖၣ်လၢတၢ်ဂ့ၢ်အံၤအဃိလံဧါ

... သုတန့ၢ်ဘၣ်တၢ်ဘၣ်, အဂ့ၢ်ဒ်အံၤ, သုတဃ့ဘၣ်တၢ်ဘၣ်. (ယၤကိာ် - ၄း၂).

စးထီၣ်လၢ လၢလံာ်စီဆှံအတၢ်ကွဲးအသး အခီၣ်ထံးလံၤလံၤ တုၤလီၤလၢ အကတၢၢ်တစု, ပကထံၣ်ဘၣ် တၢ်အုၣ်သးအမ့ၢ်အတီတဖၣ်လၢ ကစၢ်ယွၤစံးဆၢ တၢ်ထုကဖၣ်တဖၣ်န့ၣ်လီၤ. တၢ်လၢပဆိကမိၣ်လၢ ကဲထီၣ်အသးတသ့ဘၣ်တဖၣ်န့ၣ်, ကစၢ်ယွၤမၤကဲထီၣ်အီၤဖဲ ပဃ့ဘါထုကဖၣ်တၢ်အခါန့ၣ်လီၤ. ဖဲပဃ့ဘါထုကဖၣ်အခါ, ပပာ်ပသးတမံၤဃီဒီး ကစၢ်ယွၤအတၢ်တိာ်လၢပဂီၢ် ဒီး အးလီၤပသးလၢ ကစၢ်ယွၤအတၢ်စိတၢ်ကမီၤအပူၤန့ၣ်လီၤ. ခီဖျိလၢပဃ့ဘါထုကဖၣ်အဃိ, ကစၢ်ယွၤမၤတၢ်ခီဖျိပှၤ လၢကျဲလၢ အတမၤဝဲဖဲပတဃ့ဘါထုကဖၣ်ဘၣ်အဆၢကတီၢ်န့ၣ်လီၤ.

 
တၢ်လၢကစၢ်ယွၤဒုးအိၣ်ထီၣ်အီၤတဖၣ် ဒိးသန့ၤထီၣ်အသးလၢ ပတၢ်ထုကဖၣ် ဒ်သိးပကမၤန့ၢ်အီၤ အဂီၢ်, အဃိ ပမ့ၢ်တဘါထုကဖၣ်ဘၣ်န့ၣ် ပတဒိးန့ၢ်အီၤဘၣ်. တၢ်သံကွၢ်ကအိၣ်ထီၣ်ဝဲ, ပမ့ၢ်တဘါ ထုကဖၣ်ဘၣ်မီၣ် ကစၢ်ယွၤမၤတသ့ဘၣ်ဧါ? ကစၢ်ယွၤမၤဝဲသ့လီၤ. ဘၣ်ဆၣ် ကစၢ်ယွၤပာ်လီၤဝဲလၢ ကသူဝဲ အပှၤဂီၢ်မုၢ်အတၢ်ထုကဖၣ် ဒ်သိး ကမၤလၢပှဲၤ အတၢ်ပညိၣ်တဖၣ်အဂီၢ်န့ၣ်လီၤ. ဖဲပတဘါထုကဖၣ်ဘၣ် အဆၢကတီၢ်န့ၣ်, ကစၢ်ယွၤအတၢ်ဖံးတၢ်မၤလၢပတၢ်အိၣ်မူအဂီၢ် အိၣ်ပတုာ်အသးလီၤ.

 
ပှၤတနီၤနီၤတဘၣ်သူၣ်ဘၣ်သး တၢ်ဂ့ၢ်အဝဲအံၤဘၣ်. ဘၣ်ဆၣ် မ့ၢ်တမ့ၢ်တၢ်မ့ၢ်တၢ်တီဘၣ်န့ၣ်, ဘၣ်မနုၤအဃိ စီၤယၤကိာ်ဘၣ်ကွဲးဝဲ, “… သုတန့ၢ်ဘၣ်တၢ်ဘၣ်, အဂ့ၢ်ဒ်အံၤ, သုတဃ့ဘၣ်တၢ်ဘၣ်.” ဘၣ်မနုၤအဃိ စီၤပီလူးဃ့အတံၤသကိးတဖၣ်လၢက, “ဘါထုကဖၣ်တၢ်လၢ ပဂီၢ်ဒ်သိး ယွၤအကလုၢ်ကထါကဃ့ၢ်, ဒီးဘၣ်တၢ်လၤတၢ်ကပီၤ, ဒ်လၢသုကျါအသိးန့ၣ်, ဒီးဒ်သိးပကပူၤဖျဲးဒီး ပှၤလၢအနၢ်က့ၣ်ဒီး ပှၤအၢပှၤသီ န့ၣ်တက့ၢ်.” (၂ သ့းစၤလနံ - ၃း၁-၂). စီၤပီလူမ့ၢ်တနာ်တၢ်ထုကဖၣ်အတၢ်စိတၢ်ကမီၤလၢကဆီတလဲ တၢ်ဘၣ်န့ၣ်, တမ့ၢ်လၢအကမၢ အတံၤသကိးတဖၣ်လၢကဃ့ဘါထုကဖၣ်န့ၢ်တၢ်လၢအဂီၢ်ဘၣ်.

 
စီၤယၤကိာ်ဒီးစီၤပီလူး ခံဂၤလၢာ် နာ်ဝဲလၢ အဝဲသ့ၣ်မ့ၢ်တဘါထုကဖၣ်ဘၣ်န့ၣ် ကစၢ်ယွၤ အတၢ်ဆိၣ်ဂ့ၤ ဆိၣ်ဝါတဘၣ်အဝဲသ့ၣ်ဘၣ်. ခီဖျိလၢ အဝဲသ့ၣ်လိၣ်ဘၣ် တၢ်ဆိၣ်ဂ့ၤဆိၣ်ဝါဟဲလၢကစၢ်ယွၤအအိၣ် အဃိ, တမ့ၢ်ထဲအဝဲသ့ၣ်ဃ့ထုကဖၣ်လၢ အကစၢ်ဒၣ်ဝဲအဂီၢ်ဘၣ်, ဃ့ဝဲလၢ အသကိးတဖၣ်ကဃ့ဘါ ထုကဖၣ်တၢ်လၢအဝဲသ့ၣ်အဂီၢ်စ့ၢ်ကီးန့ၣ်လီၤ. အဝဲသ့ၣ်အဲၣ်ဒိးလၢ ကစၢ်ယွၤ အတၢ်ပညိၣ်လၢအဝဲသ့ၣ် အဂီၢ်ကမၤတၢ်လၢလၢပှဲၤပှဲၤအဃိ အဝဲသ့ၣ်တဆိတ့ၢ်ဃ့ထုကဖၣ်ဘၣ်. နမ့ၢ်အဲၣ်ဒိး ကစၢ်ယွၤအတၢ်ဆိၣ် ဂ့ၤဆိၣ်ဝါ လီၤဘၣ်နၤလၢလၢပှဲၤပှဲၤန့ၣ် နကဘၣ်ဃ့ဘါထုကဖၣ်စ့ၢ်ကီးန့ၣ်လီၤ.