တၢ်သိၣ်တၢ်သီ ဒီး တၢ်သးခုကစီၣ်

 

ရိမ့ၤ ၃း၂၀ႇ အဂ့ၢ်ဒ်အံၤႇ တၢ်သ့ၣ်ညါ တၢ်ဒဲးဘး ဟဲဝဲလၢ တၢ်သိၣ်တၢ်သီလီၤႉ 

လံာ်စီဆှံအလီၢ်လံၤအပူၤ ကစၢ်ယွၤဟ့ၣ် တၢ်သိၣ်တၢ်သီ ခီဖျိ စီၤမိၤရှ့န့ၣ်လီၤႉ တၢ်သိၣ်တၢ်သီ လၢယွၤ ဟ့ၣ်လီၤ ဝဲခီဖျိ စီၤမိၤရှ့အံၤန့ၣ်ႇ မ့ၢ်ဝဲတၢ်မၢလီၤ လၢကပၢကဆှၢ ပှၤကညီ အတၢ်ဖံးတၢ်မၤတဖၣ် န့ၣ်လီၤႉ လံာ်စီဆှံ အသီအပူၤ ကစၢ်ယွၤဟ့ၣ်လီၤ တၢ်သးခုကစီၣ် ခီဖျိ ယ့ၣ်ရှူးခရံာ် န့ၣ်လီၤႉ တၢ်သးခုကစီၣ်အံၤမ့ၢ်ဝဲ တၢ်ဘျုး တၢ်ဖှိၣ် အတၢ်အုၣ်က့ၤ ခီၣ်က့ၤအကစီၣ် ခီဖျိ ယ့ၣ်ရှူးခရံာ် အတၢ်တူၢ်သံအသး လၢပဂီၢ်ႇ ဒီးအတၢ်ဂဲၤဆၢထၢၣ် သမူထီၣ်က့ၤလၢနီၢ်ခိၣ်နီၢ်ခီႇ လၢပတၢ်ဒဲးဘး အဂီၢ်န့ၣ်လီၤႉ 

တၢ်သိၣ်တၢ်သီမ့ၢ် တၢ်လၢအပၢၤ ဃာ်ပသကဲာ်ပဝး လၢအမ့ၢ် တၢ်လၢပကဘၣ်မၤ ဒီး တၢ်လၢ ပတဘၣ်မၤဘၣ် တဖၣ်န့ၣ်လီၤႉ တၢ်သိၣ်တၢ်သီလၢ လံာ်စီဆှံအလီၢ်လံၤအပူၤ ပၣ်ဃုာ် တၢ်မၤလိာ်အထံၣ်တဆံ (၂ မိၤရှ့ ၂၀) တၢ်နဲၣ်လီၤလၢ တၢ်ရ့လိာ်သးဒီး ပှၤဂၤအဂီၢ် (၂ မိၤရှ့ ၂၁း၁ - ၂၃း၃၃) ဒီး တၢ်နဲၣ်လီၤလၢ ကဘၣ်ဘူၣ်ထီၣ် ဘါထီၣ်ယွၤ ဒ်လဲၣ် (၂ မိၤရှ့ ၂၅း၁ - ၃၁း၁၈) န့ၣ်လီၤႉ တၢ်သိၣ်တၢ်သီ အံၤမ့ၢ်တ့ၢ်ဝဲ တၢ်အၢၣ်လီၤအီလီၤခီဖျိ တၢ်ဖံးတၢ်မၤ လၢ ယွၤဒီး ပှၤကညီ အဘၢၣ်စၢၤႇ ဘၣ်ဆၣ် တဆှၢပှၤဆူ တၢ်ရ့လိာ်မုာ်လိာ်သးဒီး ပကစၢ်ယွၤ လီၤစိၤလီၤထီ ဘၣ်ႉ တၢ်သိၣ်တၢ်သီ မ့ၢ် တၢ်မၤလၢ အဃံးဝဲႇ မ့ၢ်လၢ တၢ်သိၣ်တၢ်သီမၢပှၤ လၢ ပကဘၣ် အိၣ်ဒီး တၢ်သကဲာ်ပဝးလၢ အဂ့ၤဝဲဘၣ်ဝဲ လၢတၢ်ကိးမံၤဒဲး အဖီခိၣ်န့ၣ်လီၤႉ ဘၣ်ဆၣ် ဖဲပမၤအီၤ တလၢပှဲၤဘၣ် အဆၢကတီၢ် တၢ်သိၣ်တၢ်သီစံၣ်ညီၣ်ပှၤဆူ တၢ်သံန့ၣ်လီၤႉ တၢ်ဖံးတၢ်မၤ အုၣ်က့ၤခီၣ်က့ၤပှၤ တသ့ဘၣ်ႇ တကးဘၣ် တမ့ၢ်လၢကအုၣ်က့ၤခီၣ်က့ၤ ပှၤအဂီၢ်ဘၣ်ႉ လံာ်စီဆှံစံးဘၣ်ပှၤလၢ ပဘၣ်တၢ်ပာ်တီ ပာ်လိၤပှၤလၢ တၢ်နာ်အဃိႇ တမ့ၢ်ဘၣ်လၢ ပမၤပိာ်ထွဲ တၢ်သိၣ်တၢ်သီ အဃိန့ၣ်ဘၣ်ႉ (ရိမ့ၤ ၃း၂၈ႉ 

ဘၣ်ဆၣ် တၢ်သးခုကစီၣ် တခီ မ့ၢ် ယ့ၣ်ရှူးခရံာ် အတၢ်သံႇ အတၢ်ခူၣ်လီၤအီၤႇ ဒီး အတၢ်ဂဲၤထၢၣ်သမူထီၣ် က့ၤ အကစီၣ် လၢပတၢ်ဒဲးဘး အဂီၢ်န့ၣ်လီၤႉ ၁ ကရံၣ်သူး ၁၅း၁-၄ႉ မ့ၢ်တၢ်ကစီၣ်လၢ ကစၢ်ယွၤမၤတၢ်လၢ ပဂီၢ်ႇ အတၢ်အုၣ်က့ၤခီၣ်က့ၤပှၤ လၢပတၢ်ဒဲးဘးအပူၤ ဒီး တၢ်သိၣ်တၢ်သီ အတၢ်စံၣ်ညီၣ် အပူၤန့ၣ်လီၤႉ တၢ်သိၣ်တၢ်သီ ဒီး တၢ်သးခုကစီၣ် ခံခါလၢာ် မ့ၢ် ပဝဲပှၤခရံာ်ဖိတဖၣ် ပဂံၢ်ထံးခၢၣ်သနၢၣ်ႇ ဒီးဖဲပသ့ၣ်ညါ အတၢ်ဘၣ်ထွဲလိာ်အသး ဂ့ၤဂ့ၤအခါန့ၣ် ကမၤစၢၤပှၤ ဖဲ ပအုၣ်ပသး လၢခရံာ်အဂ့ၢ် အခါန့ၣ်လီၤႉ ကဲထီၣ်အသးသ့ ဒ်လဲၣ်ႉ နမ့ၢ်သ့ၣ်ညါလၢ ကစၢ်ယွၤအတၢ်သိၣ်တၢ်သီ အံၤ မ့ၢ်နီၣ်ထိၣ် လၢတၢ်လၢတၢ်ပှဲၤအဂီၢ်ႇ လၢအမ့ၢ်ဝဲ တၢ်ပာ်ဖျါထီၣ် တၢ်ဒဲးဘးအံၤႇ လၢပမၤထွဲပိာ်ထွဲအီၤ တန့ၢ်ခဲလၢာ်ဘၣ်န့ၣ်ႇ တၢ်သးခုကစီၣ် မၤသဘျ့ထီၣ် က့ၤပှၤ လၢတၢ်လိၣ်လၢ တၢ်ပၢၤဃာ်တၢ်သိၣ်တၢ်သီဃံးဃံး ဒ်သိးပကဒိးန့ၢ်တၢ်ပျၢ် ပတၢ်ဒဲးဘး န့ၣ်လီၤႉ ဖဲန့ၣ် နကတဲ တၢ်သးခုကစီၣ် ဆူပှၤလၢတသ့ၣ်ညါယွၤ တဖၣ်အအိၣ် သ့ဂ့ၤဂ့ၤ ဖဲနသ့ၣ်ညါ တၢ်သိၣ်တၢ်သီ ဒီး တၢ်သးခုကစီၣ်အတၢ်ဘၣ်ထွဲလိာ်သး န့ၣ်လီၤႉ 

တၢ်သိၣ်တၢ်သီန့ၣ် လီၤဆီလိာ်အသးဒီး တၢ်သးခုကစီၣ်လီၤႉ  

ပှၤခရံာ်ဖိအါတက့ၢ် သ့ၣ်ညါ တၢ်သိၣ်တၢ်သီ ဒီး တၢ်သးခုကစီၣ် အတၢ်လီၤဆီလိာ်အသး တဆံးတက့ၢ် လံ န့ၣ်လီၤႉ အဒိႇ "နမ့ၢ်ပှၤတၢ်ဒဲးဘးဖိ ( တၢ်သိၣ်တၢ်သီ) အဃိ နလိၣ်ဘၣ် ယ့ၣ်ရှူးခရံာ် လၢကအုၣ်ခီၣ်နၤ ( တၢ်သးခုကစီၣ်) န့ၣ်လီၤႉ လံာ်စီဆှံအလီၢ်လံၤ ( တၢ်သိၣ်တၢ်သီ) ဟဲဆိလၢ လံာ်စီဆှံအသီ ( တၢ်သးခုကစီၣ်) အမဲာ်ညါ န့ၣ်လီၤႉ တၢ်သိၣ်တၢ်သီဒုးထံၣ်ပှၤ လၢပမ့ၢ်ပှၤမၤကမၣ်တၢ်ဖိႇ ဒီး တၢ်သးခုကစီၣ် အုၣ်ခီၣ်ပှၤ ခီဖျိ တၢ်ဘျုးတၢ်ဖှိၣ်အဃိ န့ၣ်လီၤႉ အဃိႇ အခီၣ်ထံးကတၢၢ်န့ၣ် ပကဘၣ်သ့ၣ်ညါ လၢပမ့ၢ် ပှၤမၤကမၣ် တၢ်ဖိ တဖၣ် ( တၢ်သိၣ်တၢ်သီ) တချုးလၢ ပသ့ၣ်ညါလၢပလိၣ်ဃ့တၢ် လၢတၢ်ပျၢ်ပတၢ်ကမၣ် အဂီၢ် ( တၢ်သးခု ကစီၣ်) န့ၣ်လီၤႉ 

တၢ်သိၣ်တၢ်သီ မၤသံတၢ်ႇ ဒီး တၢ်သးခုကစီၣ် မၤမူထီၣ်တၢ် န့ၣ်လီၤႉ ဖဲစီၤမိၤရှ့ ဒိးန့ၢ် တၢ်မၤလိာ်အထံၣ်တဆံ ဝံၤဟဲက့ၤလီၤလၢ ကစၢၢ်ဒီခိၣ် အဆၢကတီၢ် ထံၣ်ဝဲလၢ ပှၤအံၣ်စရ့လးဖိ တဖၣ် ဘါထီၣ်တၢ်ဂီၤ တၢ်ဖီၣ် အဃိႇ အဝဲကွံာ်လီၤ လၢၢ်ဘ့ၣ်ဘၣ်ခံဘ့ၣ်လၢ ပှၤအံၣ်စရ့လးဖိ တဖၣ်အအိၣ် ဒီးဖဲန့ၣ် ပှၤအဂၤ သၢကထိ သံကွံာ်ဝဲန့ၣ်လီၤႉ (၂ မိၤရှ့ ၃၂း၂၈) လီၢ်ခံဖးယံာ်ႇ ဖဲစီၤပ့းတရူး စံၣ်တဲၤတဲလီၤ တၢ်သးခုကစီၣ်အခါ ပှၤဂီၢ်မုၢ် အဂၤ သၢကထိ ဒိးန့ၢ်တၢ်အုၣ်က့ၤခီၣ်က့ၤ န့ၣ်လီၤႉ ( မၤတၢ် ၂း၄၁)

ဖဲနသ့ၣ်ညါ တၢ်သိၣ်တၢ်သီ လီၤတံၢ်လံန့ၣ် နကရှဲပၠး တၢ်ဒဲးဘး အဂ့ၢ်န့ၣ် ညီဒိၣ်ထီၣ်ဝဲလီၤႉ မ့တမ့ၢ် လၢ တၢ်သိၣ်တၢ်သီဘၣ်န့ၣ်ႇ ပတသ့ၣ်ညါ တၢ်ဒဲးဘးဘၣ်ႉ ရိမ့ၤ ၃း၂၀ စံးဘၣ်ပှၤႇ အဂ့ၢ်ဒ်အံၤႇ တၢ်သ့ၣ်ညါ တၢ်ဒဲးဘး ဟဲဝဲလၢ တၢ်သိၣ်တၢ်သီလီၤႉ ကွၢ်စ့ၢ်ကီး ရိမ့ၤ ၇း၇ တက့ၢ်ႉ 

မၤသးဒ်န့ၣ်ဒီးႇ ပကစံးဒ်လဲၣ်ႉ တၢ်သိၣ်တၢ်သီ န့ၣ်မ့ၢ် တၢ်ဒဲးဘးဧါႉ မ်အသုတမၤအသး ဒ်န့ၣ်တဂ့ၤႉ မ့တမ့ၢ် ဘၣ်တၢ်သိၣ်တၢ်သီဒီးႇ ယတသ့ၣ်ညါ ဘၣ်တၢ်ဒဲးဘး ဘၣ်ႉ အဂ့ၢ်ဒ်အံၤႇ တၢ်သိၣ်တၢ်သီ မ့ၢ်တစံးဘၣ်ဝဲႇ သုတသးကွံတၢ်တဂ့ၤန့ၣ်ဒီးႇ ယတသ့ၣ်ညါဘၣ် တၢ်သးကွံဘၣ်ႉ ရိမ့ၤ ၇း၇

အဃိ ပှၤကိးဂၤဒဲးလိၣ်ဘၣ် တၢ်အုၣ်က့ၤခီၣ်က့ၤအီၤ န့ၣ်လီၤႉ ပှၤကိးဂၤဒဲးလိၣ်ဘၣ် တၢ်သးခုကစီၣ် န့ၣ်လီၤႉ 

တၢ်သိၣ်တၢ်သီမ့ၢ် တၢ်လၢအဖျါလီၤဆီတခါန့ၣ်လီၤႉ တၢ်သိၣ်တၢ်သီတဲပှၤလၢ အိၣ်စီအိၣ်ဆှံ တက့ၢ်ႇ ဘၣ်ဆၣ် ဒုးနဲၣ်ပှၤလၢ ပတမ့ၢ်ပှၤလၢ အိၣ်စီအိၣ်ဆှံ သးတဖၣ်ဘၣ်ႉ တၢ်သိၣ်တၢ်သီတဲပှၤ လၢ ပတဘၣ်လီတၢ်ဘၣ်ႇ ဘၣ်ဆၣ် ဒုးနဲၣ်ပှၤလၢ ပလီတၢ်အခါဖဲလဲၣ် န့ၣ်လီၤႉ တၢ်သိၣ်တၢ်သီတဲပှၤလၢ ပကဘၣ်ပာ်ဒိၣ် ပယွၤပကစၢ်န့ၣ်လီၤႇ ဘၣ်ဆၣ် ဒုးနဲၣ်ပှၤလၢ ပမၤအီၤ တတုၤထီၣ်ဘး ဒ်လဲၣ် န့ၣ်လီၤႉ လၢတၢ်န့ၣ်အဃိႇ မ့ၢ်လၢ ပဝဲ ကိးဂၤဒဲး ပမၤပိာ်ထွဲ တၢ်သိၣ်တၢ်သီကိးမံၤဒဲး အခံတန့ၢ်နီတဂၤဘၣ် အဃိႇ ပအိၣ်လၢ တၢ်စံၣ်ညီၣ်ဃၣ် အဖီလာ် န့ၣ်လီၤႉ ကျဲလၢ ပကဟးထီၣ်အဂီၢ် တအိၣ်နီတဘိဘၣ်ႉ ပမၤတၢ်မနုၤကသ့လဲၣ်ႉ တသ့နီတမံၤဘၣ်ႉ လၢတၢ်န့ၣ်အဃိ တၢ်သိၣ်တၢ်သီ ကဲထီၣ် ပှၤပၢဆှၢပှၤ ဆူ ကစၢ်ခရံာ်အအိၣ်ႇ ဒ်သိး ပကဘၣ်တၢ်ပာ်တီပာ်လိၤ ပှၤလၢ တၢ်နာ်အဃိ န့ၣ်လီၤႉ ( ကလၤတံ ၃း၂၄) တၢ်သိၣ်တၢ်သီ ဆှၢပှၤဆူ ခရံာ်အအိၣ်န့ၣ်လီၤႉ သ့ဝဲဒ်လဲၣ်ႉ သ့ဝဲခီဖျိ ဒုးနဲၣ်ပှၤလၢ ပတၢ်ဂုာ်ကျဲးစၢး မၤပိာ်ထွဲတၢ်သိၣ်တၢ်သီ အခံ ( တၢ်ဖံးတၢ်မၤ) န့ၣ်တလၢပှဲၤဝဲ လၢပကဒိးန့ၢ် တၢ်မူအထူအယိာ်အဂီၢ်ဘၣ်ႇ ထဲလၢ တၢ်ဘျုးတၢ်ဖှိၣ် အတၢ်သးခုကစီၣ် ဧိၤ မ့ၢ်ကျဲထဲတဘိ ဆူကစၢ်ယွၤ အအိၣ်န့ၣ်လီၤႉ 

ပမ့ၢ်တဲလၢကျဲအဂၤတဘိန့ၣ်ႇ နကဘၣ်မၤစၢၤ ပှၤဂၤလၢ ကသ့ၣ်ညါ ထံလၢ အဝဲသ့ၣ်အတၢ်ဂ့ၤ တၢ်ဝါ တအိၣ်တုၤဒၣ်လဲာ် ကစၢ်ယွၤ ကသးအိၣ်အဝဲသ့ၣ်န့ၣ်လီၤႉ ပှၤအါဂၤ ဆိကမိၣ်ဝဲလၢ မ့ၢ်လၢအဝဲသ့ၣ် မ့ၢ်ပှၤဂ့ၤ ဒီး မၤတၢ်ဂ့ၤအဃိ အဝဲသ့ၣ်ကလဲၤအိၣ်ဘၣ်ဒီးယွၤ ဖဲအသံဝံၤအလီၢ်ခံန့ၣ်လီၤႉ ဘၣ်ဆၣ် လံာ်စီဆှံ စံးဘၣ်ပှၤလၢ ပမ့ၢ်ပှၤဂ့ၤ ဒီး ပမၤ တၢ်ဂ့ၤ န့ၣ် တဂ့ၤခဲလၢာ်ခဲဆ့ဒံးဘၣ်ႉ ကစၢ်ယွၤလိၣ်ဘၣ် တၢ်လၢတၢ်ပှဲၤႇ တၢ်ဂ့ၤတုာ် န့ၣ်လီၤႉ 

တၢ်အုၣ်က့ၤခီၣ်က့ၤဟဲဒၣ်လၢယွၤအအိၣ်န့ၣ်လီၤႉ 

လၢတၢ်န့ၣ်အဃိႇ တၢ်အုၣ်က့ၤခီၣ်က့ၤန့ၣ် ဟဲဒၣ်လၢ ကစၢ်ယွၤ အအိၣ်ႇ ( စံးထီၣ်ပတြၢၤ ၃း၈) ခီဖျိ တၢ်နာ် တမ့ၢ်ဘၣ်လၢ တၢ်မၤဘၣ် ( ရိမ့ၤ ၄း၅) ႉ လၢတၢ်န့ၣ်အဃိႇ တၢ်အုၣ်က့ၤခီၣ်က့ၤ န့ၣ်မ့ၢ် ယွၤအတၢ်ဟ့ၣ်လၢ တအိၣ်ဒီး အလုၢ်အပှ့ၤဘၣ် ( ရိမ့ၤ ၆း၂၃) ခီဖျိ တၢ်ဘျုးတၢ်ဖှိၣ် ( အ့းဖ့းစူး ၂း၈-၉) န့ၣ်လီၤႉ လၢတၢ်န့ၣ်အဃိႇ ကစၢ်ယွၤ ဘၣ်ဟံးန့ၢ် ပှၤကညီအက့ၢ်အဂီၤ ( ယိၤဟၣ် ၁း၁ ဒီး ၁၄) ဒီးမၤလၢပှဲၤ တၢ်သိၣ်တၢ်သီ ဒ် ရိမ့ၤ ၈း၃ စံးဝဲအသိးႇ 

အဂ့ၢ်ဒ်အံၤႇ တၢ်လၢတၢ်သိၣ်တၢ်သီ မၤတသ့ဘၣ်ႇ လၢအဂံၢ်အဘါစၢ်လၢ တၢ်ဖံးတၢ်ညၣ် အဃိန့ၣ်ႇ ယွၤမၢ လီၤအဖိခွါဒၣ်ဝဲ အိၣ်ဒီး တၢ်ဒဲးဘး အဖံးအညၣ် အက့ၢ်အဂီၤႇ ဒီးလၢတၢ်ဒဲးဘးအဃိႇ ဒီးစံၣ်ညီၣ်ဃၣ် တၢ်ဒဲးဘးလၢ တၢ်ဖံးတၢ်ညၣ်အပူၤႉႉ ( ရိမ့ၤ ၈း၃)

တကးဒံးဘၣ်ႇ ကလၤတံ ၃း၂၁ စံးဘၣ်ပှၤႉႉႉ 

မၤသးဒ်န့ၣ်ဒီး မ့ၢ်တၢ်သိၣ်တၢ်သီ ထီဒါယွၤ အတၢ်စံးပာ်တဖၣ်ဧါႉ မ်အသု တမၤအသးဒ်န့ၣ် တဂ့ၤႉ အဂ့ၢ်ဒ်အံၤႇ တၢ်မ့ၢ်ဟ့ၣ်တၢ်သိၣ်တၢ်သီလၢ အမၤမူတၢ်သ့ဒီးႇ ကမ့ၢ်မး တၢ်တီတၢ်လိၤ ကဟဲလၢ တၢ်သိၣ်တၢ်သီ န့ၣ်လီၤႉ ( ကလၤတံ ၃း၂၁) 

အ့းဖ့းစူး ၂း၈ စံးဘၣ်ပှၤႉႉႉ 

အဂ့ၢ်ဒ်အံၤႇ သုတုၤလၢ တၢ်အုၣ်က့ၤခီၣ်က့ၤ သုလၢ တၢ်ဘျုးတၢ်ဖှိၣ် လၢတၢ်နာ် အဃိလီၤႉ ဒီးအဝဲန့ၣ် တမ့ၢ်ဘၣ်လၢ သုဃိ ဒၣ်သုဝဲဘၣ်ႇ မ့ၢ်ယွၤ အတၢ်ဟ့ၣ်လီၤႉ ( အ့းဖ့းစူး ၂း၈) 

ရိမ့ၤ ၄း၅ စံးဘၣ်စ့ၢ်ကီးပှၤႉႉႉ 

မ့မ့ၢ် ပှၤလၢ အတမၤဘၣ်တၢ်ဘၣ်ႇ ဒီးနာ်ပှၤလၢ အပာ်တီပာ်လိၤပှၤ တယူးတယီၣ်ဘၣ် ယွၤန့ၣ်ႇ တၢ်ပးကဲ အတၢ်နာ်လၢ တၢ်တီတၢ်လိၤလီၤႉ 

အဃိႇ ဖဲနတဲတၢ်သးခုကစီၣ် အဆၢကတီၢ်န့ၣ် နကဘၣ်ဒုးနဲၣ်ဖျါထီၣ် လၢ တၢ်ဟံးဃာ်တၢ်သိၣ်တၢ်သီ ဃံးဃီၣ်ဒီၣ်အံၤ ဘၣ်တၢ်တြူာ်ကွံာ်အီၤလံႉ တဲဒ်အံၤႇ လံာ်စီဆှံစံးဝဲ နမ့ၢ်မၤဟးဂီၤယွၤ အတၢ်သိၣ်တၢ်သီ ထဲတခါဧိၤ ဘၣ်ဆၣ်ႇ နကဘၣ်တၢ်စံၣ်ညီၣ်ဃၣ် န့ၣ်လီၤ ( ယၤကိာ် ၂း၁၀-၁၁) ႉ တၢ်ဒဲးဘး ဘၣ်တၢ် ပျၢ်ကွံာ်အီၤသ့ႇ ဘၣ်ဆၣ် နကဘၣ်ဆဲးတူၢ်ဘၣ်အဘူးအလဲဒံးလီၤႉ တၢ်ဒဲးဘးအဘူးအလဲ မ့ၢ်တၢ်သံလီၤႉ နတၢ်ဒဲးဘး ထီဒါ ပှၤလၢအဟ့ၣ်လီၤ တၢ်သိၣ်တၢ်သီလၢ အမ့ၢ် ကစၢ်ယွၤန့ၣ်လီၤႉ ဘၣ်ဆၣ် ယ့ၣ်ရှူးခရံာ်ႇ လၢအမ့ၢ်ယွၤလၢအဟံးန့ၢ်ပှၤဟီၣ်ခိၣ်ဖိ အက့ၢ်အဂီၤႇ ဟံးန့ၢ်ပတၢ်ဒဲးဘးခဲလၢာ် ဆူထူၣ်စုညါအလိၤႇ ဒီးသံဃုာ်ဒီး အီၤန့ၣ်လီၤႉ နမ့ၢ်အဲၣ်ဒိး နတၢ်ဒဲးဘၣ် ဘၣ်တၢ်ပျၢ်ကွံာ်အီၤဒီးႇ နကဘၣ်ဟဲဆူကစၢ်ယ့ၣ်ရှူးခရံာ်အအိၣ်ႇ ဒီးဃ့ပျၢ်နတၢ် ဒဲးဘးန့ၣ်လီၤႉ အဝဲကပျၢ်နတၢ်ဒဲးဘးခဲလၢာ်လီၤႉ 

( ဟံးန့ၢ်ကွဲးကျိာ်ထံအီၤလၢ Law and Gospel: https://carm.org/doctrine-and-theology/law-and-gospel/ )